عبدالله عبدالله، رییس شورای عالی مصالحه‌ افغانستان، به تاجیکستان رفت و پس از ورود به دوشنبه، پایتخت این کشور، با قاهر رسول‌زاده، نخست‌وزیر، و محمدطاهر ذاکرزاده، رییس مجلس نمایندگان تاجیکستان، دیدار و گفت‌وگو کرد.

نخست‌وزیر و رییس مجلس نمایندگان تاجیکستان در دیدارهای جداگانه با عبدالله عبدالله، از تلاش‌های صلح افغانستان اعلام حمایت کردند، روابط تاجیکستان و افغانستان را «نیک و حسنه» خواندند و گفتند تاجیکستان همواره خواهان برقراری صلح و ثبات در افغانستان است.

رییس شورای مصالحه افغانستان به دعوت تاجیکستان، صبح دوشنبه ۱ جدی/دی، در راس هیاتی دولت با هدف جلب حمایت کشورهای منطقه از تلاش‌های صلح افغانستان، به این کشور رفت.

شورای مصالحه افغانستان با نشر خبرنامه‌ای، اعلام کرد رییس مجلس نمایندگان تاجیکستان در دیدار با عبدالله عبدالله، «صلح و ثبات در افغانستان را به‌نفع صلح، ثبات، ترقی و توسعه در منطقه خواند و ابراز امیدواری کرد که تلاش‌های صلح به رهبری رییس شورای عالی مصالحه‌ افغانستان به نتیجه‌ مطلوب برسد».

نخست‌وزیر تاجیکستان نیز افغانستان را از دوستان و متحدان کشورش خواند و از تلاش‌های صلح افغانستان استقبال کرد.

عبدالله عبدالله در دیدار با مقام‌های تاجیکستان، روابط میان دو کشور را مبتنی بر ارزش‌های تاریخی‌ـ‌فرهنگی توصیف کرد و در مورد تلاش‌های صلح در افغانستان، مذاکرات با طالبان، نقش کشورهای منطقه و تاجیکستان در تامین صلح صحبت کرد و خواهان ادامه همکاری و حمایت مجلس نمایندگان و حکومت تاجیکستان از تلاش‌های صلح شد.

رییس شورای مصالحه‌ افغانستان گفت: «جمهوری تاجیکستان تجربه‌ خوبی در زمینه ختم جنگ داخلی و دست‌ یافتن به صلح و رفاه دارد و می‌تواند با افغانستان در این راستا همکاری کند.»

قرار است عبدالله عبدالله در این سفر با امام‌علی‌ رحمان، رییس‌جمهوری، و سراج‌الدین مهرالدین، وزیر امور خارجه‌ تاجیکستان، دیدار و در مورد روند صلح افغانستان گفت‌وگو کنند.

پیش از این، عبدالله عبدالله برای جلب حمایت کشورهای منطقه از روند صلح افغانستان، به کشورهای پاکستان، ایران، هند، ازبکستان و ترکیه سفر کرده بود. رهبران این کشورها در دیدار با عبدالله عبدالله، از روند صلح افغانستان اعلام حمایت کردند و خواهان آتش‌بس شدند.

این سفر در حالی صورت گرفته است که مذاکرات صلح بین‌افغانی پس از سه ماه، به‌طور موقت متوقف شده اما خشونت‌ها در افغانستان افزایش یافته است و این کشور روزهای خونینی را سپری می‌کند.

مسعود اندرابی، وزیر امور داخله/کشور افغانستان، دیروز در محل وقوع انفجار یک ماشین بمب‌گذاری‌شده در شهر کابل حضور پیدا کرد و به خبرنگاران گفت شورای طالبان مستقر در پاکستان، موسوم به شورای کویته، تصمیم گرفته است حملات انتحاری و انفجارها در شهرهای افغانستان را افزایش دهند.

امرالله صالح، معاون اول ریاست‌جمهوری افغانستان، امروز دوشنبه رقم تلفات انفجار دیروز کابل را دست‌کم ۱۰ کشته و ۵۲ زخمی اعلام کرد. گروه طالبان هرگونه دخالت در این انفجار را تکذیب کرده است.